09 مارس 2009

قصائد في رثاء الفريق عبد المنعم رياض

Riad 1

رسالة إلى عبد المنعم رياض

نزار قباني

لو يُقتَلونَ مثلما قُتلتْ..

لو يعرفونَ أن يموتوا.. مثلما فعلتْ

لو مدمنو الكلامِ فى بلادنا

قد بذلوا نصفَ الذى بذلتْ

لو أنهم من خلفِ طاولاتهمْ

قد خرجوا.. كما خرجتَ أنتْ..

واحترقوا فى لهبِ المجدِ، كما احترقتْ

لم يسقطِ المسيحُ مذبوحاً على ترابِ الناصرةْ

ولا استُبيحتْ تغلبٌ

وانكسرَ المناذرةْ..

لو قرأوا - يا سيّدى القائدَ - ما كتبتْ

لكنَّ من عرفتهمْ

ظلّوا على الحالِ الذى عرفتْ..

يدخّنون، يسكرونَ، يقتلونَ الوقتْ

ويطعمونَ الشعبَ أوراقَ البلاغاتِ كما علِمتْ

وبعضهمْ.. يغوصُ فى وحولهِ..

وبعضهمْ..

يغصُّ فى بترولهِ..

وبعضهمْ..

قد أغلقَ البابَ على حريمهِ..

ومنتهى نضالهِ..

جاريةٌ فى التختْ..

يا أشرفَ القتلى، على أجفاننا أزهرتْ..

الخطوةُ الأولى إلى تحريرنا

أنتَ بها بدأتْ..

يا أيّها الغارقُ فى دمائهِ

جميعهم قد كذبوا.. وأنتَ قد صدقتْ..

جميعهم قد هُزموا

ووحدكَ انتصرت …

******* 

 

عبد المنعم رياض

أحمد فؤاد نجم

زعق الوابور ع السفر
انا قلت كان بدري
نعق الغراب ع الشجر
خطف الفراق بدري
جدع
ما شفناش جدع
فات فى البلد زيه
عيط عليه القمر
والنجمه فى البدري
يا نني عين البلد
يا ابن البلد يا عزيز
بكيت عيون الولد
والبنت
والعواجيز
يا قلب مصر النقي
وقلب مصر بياض
عزيز علينا اللقا
بعد الفراق يا رياض
يا عتره الحراس
يا بو الادين تنباس
ياريتنى كنت معاك
وشربت نفس الكاس
هطال يا دمع البكا
واللى بكي لم طال
دم الجدع
يا جدع
سال ع الكنال
هطال
يروي على ارضينا
حدوته بالموال
بعد الصلا ع النبي
يا ليل يا عين يا نضال
ملعون يا داء البكم
ملعون يا طول البال
بعد الوطن ما اندهس
وصار ترابه حلال
للغاصب الاجنبي
والجبنا والاندال
يا حر قلب الناس
على رنه الاجراس
الشعب كله رياض
ورياض مثل
يا ناس
يا نني عين البلد
يا ابن البلد
يا شجيع
دمك عزيز ع البلد
عمر العزيز ما يضيع
كلمه وقالتها البلد
فى لحظه التوديع
بالدم
نفدي البلد
لا سلم
لا تمييع
وان كان طريقك سفر
تفنيه خطاوينا
وتغوص فى جوف السحر
وعقولنا تهدينا
وان كان طريقك حجر
حتبشبشه ادينا
ونرشه من دمنا
من عندنا لسينا
يا رنه الاجراس
دقي وصحي الناس
ملعون ابوك يا خوف
بعد الشرف ما انداس .

  *******

 

عبد المنعم رياض

فؤاد حداد

يا سامعين أبناء بلد واحدة
تحت السما الواحدة أدان المعارك
و تعيشي يا مصر عمري ما انسى نهارك
واحد و عشرين شهر بعد يوم تسعة يونيه
الدمع نوَّر بالشرف و العزة
و الحزن نوَّر في صميم القلب
عبد المنعم رياض
أكتر من أم و أب
لسه الحياة مبدأها
ما تبتسملكش إلا من شهداءها
كل النوبات و الورادي اللي بتعرقها
حيعرفوها ولادك لما يستشهد
عبد المنعم رياض
أكتر من أم و أب
يا كلنا ولاد العطش و النيل
و كلنا بنحتاج لكلمة حق
و النور ياخدنا بإيده في الأيام
المعركة طلعت لفوق الجدود
و التضحيات فيها الرغيف و الخلود
و الدم الأحمر و الضنا مولود
و الشمس ما تبطلش فجر و عرق
و كل يوم عن كل يوم افترق
حيلتقوا ساعة ما يجمعنا
عبد المنعم رياض
أكتر من أم و أب
يا كل يوم من بُكره و امبارح
و سؤال و رد البيت مع الشارع
الشعب من راجل لطفل بيعرف
ياما في جميع السن و الأعمار
خضعت ليالي لشرع الاستعمار
الشعب يعرف مصر و فلسطين
يعرف منارة يولية بين السنين
و مهاجرين في الله مع الأنصار
و الشعب يعرف من تاريخه الليل
و الشعب يعرف من تاريخه النهار
و الشعب يسقي الأرض يعرف مقام
القمح و الحرية بين الشجر
و الشعب يقرا في الجبين و الحجر
كل المعاني أصبحت إنسان
عبد المنعم رياض
أكتر من أم و أب
الدمعة نزلت و الميدان انفجر
ما أعظمك يا مصر
لما لهدف واحد تصب العيون
و الصوت يلبي و الأيادي معاه
عبد المنعم رياض
أكتر من أم و أب
أكتر من أم و أب معنى الآه
في أوجع الأيام و أرحمها
في شعب مصري من حنانه و شقاه
كان يبكي لما يشوف بأمر الحياة
إيد اليتيمة قربت لطعامها
نغالب الدنيا و نحفر ظلامها
لو تفزع النسمة نِحِسّ القدر
نعرف ميعادنا في المهالك حضر
شرع الكرامة شرع الاستشهاد
ننهض مع الأرض اللي تولد رياض
و نمشي بالرقبة اللي فيها التار
ما نتلفتش
نطلع على شط القنال التاني
طالع على شط القنال التاني
قال للسما و الأرض انتي الباقية
و لكل حبة خير يا أمي الغالية
و للشهادة يا وطن أوطاني
أول سلامه من عينيه الهادية
يعرف وراه الطيبين و الدار
و يطفّي من قلبه البلد و الساقية
ما يشوفش يوم قدامه إلا التار
القنطرة الشرقية و الصقّالة
يقولوا تُبت في البنا و الحرب
اعرف بحقدك بهجة الرجالة
و اسمع رصاصك زي طير ينحب
الزرع نوَّر لما ابنك شافك
و الشمس طلعت لما جرحك لم
انت الأصيل لازم تشيل بكتافك
ما ينكتبش التار بغير الدم
امشي الليالي في الظلام الطارئ
يا مصري خالد في العرق و النور
تكتب و تقرا على الجبين الصادق
كل اللي يختار الشقا منصور
كان رياض فارس مجاهد
السلاح و القلب واحد
في عيون الشعب خالد
كل أيامنا رياض
كان رياض أُمَّة كريمة
نوَّرت فيها العزيمة
لاجل ذكراه الرحيمة
كل أيامنا رياض
كان رياض دمعة في قلبه
يعرف الحق اللي طالبه
احنا طول الليل نصاحبه
كل أيامنا رياض
كان رياض عايش حياته
بالعرق يسقي نباته
مبدأ الإنسان تباته
كل أيامنا رياض
كان رياض دايماً يفكر
في النبات ازاي بيكبر
احضنوا القطن المنوَّر
كل أيامنا رياض .

‏ليست هناك تعليقات:

إرسال تعليق

اطرق الباب و اترك رسالة !